Блокадата на која одеднаш инсистира Софија им одговара на оние кои не сакаат проширување на ЕУ, оценува професорот Гарчевиќ

Добивај вести на Viber

Во анализа за Дојче Веле, професорот по меѓународни односи на Универзитетот во Бостон и поранешен црногорски амбасадор во НАТО и ОБСЕ, Веско Гарчевиќ оценува дека дел од земјите членки на Европската Унија, како што е Бугарија, иако имаат проблем со сопствениот имиџ, ја користат сегашната ситуација во Унијата нивните билатерални спорови, односно, како што вели внатрешнополитички прашања, да ги претвораат во проблем со кој треба да се занимава Брисел.

– Во актуелната ситуација во Унијата, блокадата на која одеднаш инсистира Софија им одговара на оние кои не сакаат проширување во догледна иднина, да не кажеме никогаш. Така, прашањата на периферијата на Унијата, како што се идентитетски односи меѓу Бугарија и Северна Македонија стануваат добра причина за да се забави процесот на приближување кон ЕУ, иако земјата-кандидат, во случајов, Северна Македонија, ги исполни сите обврски во овој момент, вели професорот Гарчевиќ во анализата за Дојче Веле.

Понатаму, како што тој анализира, одлуката на ЕУ да не ги започне преговорите со Македонија и со Албанија е само уште една потврда дека Западен Балкан е заборавен, бидејќи Унијата во моментов е преокупирана со многу други прашања. Но, според него, последиците од ваквиот пристап се многу сериозни, не само за регионот, туку и за самата Унија.

– Кога партнерот се чувствува запоставен, тој се врти кон некој друг, зарем не? Засилувањето на национализмот и шовинизмот, идејата за прекројување на границите и падот на популарноста на ЕУ се одвива паралелно со засиленото присуство на Русија и Кина. Москва, и се повеќе Пекинг, се покажуваат како посакувани алтернативи за незаинтересираната и ситничава ЕУ, вели Гарчевиќ.