Богоевски за Морина: Одлуката е донесена под политичко влијание

Добивај вести на Viber

Граѓанскиот активист и поранешен пратеник Павле Богоевски оценува дека скопскиот кривичен суд под политичко влијание одлучил поранешниот припадник на ОВК Томор Морина не треба да се испорача на Србија.

-Ова е погрешен тип на политичко влијание врз судството. Се' додека имаме високи владини претставници, вицепремиери и градоначалници кои однапред го наведуваат судството во која насока треба да одлучува - нема да имаме судство-напиша еден од водачите на Шарената револиција на својот Фејсбук профил.

Тој напоменува дека скопскиот кривичен суд „пресече дека не се исполнети условите за есктрадиција на Томор Морина, поранешен висок претставник на ОВК“ , истакнувајќи дека лицето кое се бара со меѓународна потерница на Интерпол, нема да им биде предадено на властите кои го бараат.

„Да појаснам, во поглед на прашањето Србија/Косово, го поддржувам правото на самоопределување и независноста на Косово (став кој официјално го дели и нашата држава).

Но, како можеме да очекуваме некој друг да ни ги врати нашите побегнати криминалци, кога ние не го правиме истото?-пишува Богоевски кој беше дел од владеачката коалиција.

Кривичниот совет на Основниот суд Скопје1 одлучи дека не се исполнети условите за екстрадиција на Морина во Скопје по прегледот на документацијата во барањето и ценејќи ја досегашната пракса и меѓународно право.

Тоа решение, заедно со документацијата, е проследено до Врховниот суд на Република Северна Македонија, кој може да го потврди или поништи. До правосилноста на таа одлука Морина ќе остане во екстрадиционен притвор во Скопје, во кој се наоѓа од 25 јули.

Морина беше приведен на 24 јули на граничниот премин Блаце од Косово по потерница на Интерпол.

Таа потерница е издадена на барање на српските власти кои Морина го бараат поради сомнение дека како припадник на ОВК направил злочин над цивилносто население на Косово пред 20 години.

Барањето на Србија за екстрадиција на Морина Министерството за правда на Македонија на скопскиот кривичен суд му го достави во понеделнкот на 5 август.