Бушати: Албанците во Македонија се клучен фактор за демократска стабилност
Објавено во: Балкан 20 Февруари, 2017
Шефот на албанската дипломатија, Дитмир Бушати вели дека Албанците во Македонија се клучен фактор за демократската стабилност и за иднината на евроатлантските интеграции на Македонија.
Додава дека веќе една деценија тие бараат признавање на албанскиот јазик како официјален јазик, иако се неколкупати побројни од Србите на Косово, кои се 6%, но нивниот јазик е официјален.
„Во Косово српското малцинство сочинува само 6% од населението, а српскиот јазик e официјален јазик и 10% од пратеничките мандати се резервирани за националните малцинства, но би можеле да освојат и повеќе места во парламентот, во зависност на изборната динамика. Албанското население, пак, е државотворен фактор во Македонија и е неколкупати побројно од српското малцинство на Косово и, гледано од оваа перспектива, има голем контраст, оти веќе една деценија Албанците во Македонија бараат разбирање за признавање на албанскиот јазик за официјален“ – кажа Бушати на предавањето пред студентите на Универзитетот „Луиѓи Гуракуќи“.
Бушати нагласи и дека „долгата криза во Македонија, вознемирувачкиот развој на настаните во косовско-српските односи, како и стагнацијата во Босна и Херцеговина и интервенцијата на трет фактор во внатрешно-политичките промени во Црна Гора се некои индикатори што зборуваат за недоволното внимание од страна на ЕУ“.