Дали првата жена директорка на ЦИА ги кршела човековите права?

Добивај вести на Viber

Нина Хаспел е номинирана од американскиот претседател Доналд Трамп да биде првата жена во историјата која ќе ја води Централната разузнавачка агенција на САД (ЦИА), но нејзиното минато може да и застане на патот во добивање на функцијата, особено при задолжителното сведочење пред Конгресот на САД за досегашните нејзини активности.

За Хаспел се знае само дека во 2002 година водела тајни затвори на непознати локации за јавноста во Југоисточна Азија, каде се вршела програма за засилено испрашување. Всушност станува збор за многу агресивна тактика на ЦИА за третирање на воени заробеници, осомничени терористи или лица од посебен интерес. Вакви тајни затвори ЦИА има на повеќе локации низ светот и често во периодот додека Џорџ Буш водеше војна во Авганистан и Ирак беа киднапирани или транспортирани различни осомничени лица, но без никакво судење, адвокат или почитување на човековите права, туку беа третирани како легитимни цели од страна на разузнавачките служби.

Проблематично за Хаспел е тоа што врз затворениците била применета тортура во тајниот центар кој таа го водела во Тајланд, како и фактот што наредила да бидат избришани видео лентите од постапките.

Хаспел со децении е во ЦИА и претежно работела на терен, до неодамна немаше ниту една нејзина јавна слика, таа е преискусен оперативец на службата, а водела повеќе важни дивизии.

Трамп прво ја номинираше за заменик директор на ЦИА што е нејзина прва функција на така високо политичко ниво, но откако директорот Мајк Помпео го назначи за нов Државен секретар, на негово место треба да дојде првата жена директор секако доколку Конгресот ја одобри.