Дескоска: СЈО во иднина ќе ги гони само високите јавни функционери
Објавено во: Македонија 06 Март, 2019
Рената Дескоска, министерката за правда, денеска изјави дека во иднина суштината на разграничувањето во работата помеѓу Специјалното јавно обвинителство и она редовното ќе биде тоа што ова првото ќе го гони исклучиво криминалот на јавните функционери.
- Станува збор за онаа висока корупција, која ќе се бара кај нас, кај актуелната власт, но и кај сите понатамошни, рече Дескоска на денешниот брифинг со новинарите.
Таа додаде дека во носењето на новото законско решение кое вчера помина на владина седница и е испратено до Собранието биле консултирани обвинители, професори и странски експерти, како и самото СЈО.
За носењето на овој закон е потребно двотретинско мнозинство, а едно од неговите обележја е тоа што СЈО ќе продолжи да работи без т.н. „бомби“, односно прислушкуваните материјали.