Додик бара поголема автономија за Република Српска
Објавено во: Балкан 15 Март, 2018
Претседателот на српскиот ентитет во Босна и Херцеговина, Милорад Додик вели дека Република Српска сака поголема автономија и да ѝ бидат вратени надлежностите што ги имаше со Дејтонскиот договор.
Додик вели дека доколку бидат исполнети овие барања, тогаш Република Српска ќе нема потреба да ја напушта БиХ.
„Тоа не е нејасна, ниту нефер политичка цел“ - изјави Додик во интервју за загребскиот весник „Вечерњи лист“.
Додик потенцира дека иднината на сите граѓани на БиХ треба да биде насочена кон мирот, затоа што „е подобро да се живее и ваков тежок живот, отколку да се влезе во хаос“.
„Хаосот и насилството нема ништо да решат. Но, политичките процеси и разбирањето можат да подобрат многу работи“- вели Додик.
Според него, би било фер босанските Хрвати да се чувствуваат „свои на своето“, што би се овозможило со создавање на трет хрватски ентитет во Босна и Херцеговина. Додик вели дека не е против никого и дека секој треба да биде свој на своето.
Тој оценува дека создавањето на таков трет ентитет, кој би ги имал истите права како што сега ги имаат Република Српска и Федерацијата БиХ, би ја зајакнало позицијата на Хрватите во земјата.