Дража Петровиќ за ФАКТОР: Ги молиме Македонците да ни пратат преведувач, за полесно да го срушиме Вучиќ по тоа ваше сценарио

Добивај вести на Viber

Протестите на опозицијата во соседна Србија изминатиов викенд го достигнаа врвот. Над педесетина демонстранти упаднаа во државната телевизија РТС во саботата вечерта со барање телевизијата да му се врати на народот, бидејќи националниот сервис не известувал за протестите кои во континуитет се одржуваат во последниот период. Претседателот Александар Вучиќ во неделата напладне одржа прес-конференција на која им порача на демонстрантите дека нема да се толерира никакво насилство и никакви „македонски сценарија“ во Србија. 

Главниот и одговорен уредник на дневниот весник „Денес“ од Белград , Драгољуб Дража Петровиќ за Фактор ја коментира ситуацијата во соседна Србија и вели дека радикализацијата на протестите морала да се случи.

Петровиќ вели дека протестите траат подолго а имаат за цел да покажат дека во Србија сепак има опозиција и незадоволни граѓани. 

„Упадот во РТС е предизвикан од срамното известување на тој јавен сервис, кој 100 дена од почетокот на протестот не повика никој од лидерите на граѓанскиот бунт, без разлика дали е политичар или некој друг, во емисиите да зборува на таа тема“, вели Петровиќ. 

Тој сепак посочува дека не треба да се упаднува во редакциите и да се плашат новинарите, но барањето на демонстрантите било да добијат само две минути во централниот Дневник.

„Наместо тоа скромно барање, главниот уредник на 90% од српските телевизии Александар Вучиќ, испрати полиција. Тој е самовљубен автократ кој го поддржува ЕУ и мислам дека сегашната ситуација не му одговара бидејќи светот се повеќе зборува за неговата приватна партиска држава, каква што моментално е Србија“ - потенцира Драгољуб Петровиќ.

Коментирајќи ги „македонските сценарија“ за кои обвинува самиот претседател, главниот и одговорен уредник на еден од попознатите српски дневни весници смета дека „Македонското сценарио е фраза која српските власти ја користат за да му покажат на својот гласач дека некоја виша сила ги урива „патриотските“ власти по регионот.

„Српскиот народ најмногу верува во теории на заговор, па затоа добро звучи тоа таканаречено македонско сценарио. А и нашите два народи се сметаат за братски, така да емоцијата со тоа е поголема, во фазонот: „Еве што им направија на Македонците, а сега се подготвуваат за Србите“, вели Петровиќ низ шега додавајќи  - “проблемот на српската опозиција во пишувањето на таканаречено македонско сценарио за рушење на Александар Вучиќ наиде на проблем бидејќи никој од овдешните сценаристи на македонското сценарио не знае македонски јазик. Така да ги молиме Македонците да ни испратат еден добар преведувач, за полесно да го срушиме Вучиќ по тоа ваше сценарио“, заклучува Петровиќ.

И.С.

Фото: Фејсбук