ЕЦБ продолжува со програмата: Еврозоната уште има потреба од поттикнување

Добивај вести на Viber

Претседателот на Европската централна банка (ЕЦБ) Марио Драги изјави вчера на крајот на седницата на банката по монетарната политика дека инфлацијата останува ниска во еврозоната и дека 19-те земји кои ја вовеле единствената валута, имаат потреба од уште парични стимулации, пренесоа AP.

Драги даде традиционална прес-конференција по состанокот на 25-те членови на Управниот одбор, на која водечките камати останаа без промена.

Еврото поскапе до близу 14-месечен врв во четвртокот попладне по изјавата на Драги дека последниот подем на валутата не е доволен повод за загриженост за Управниот одбор, пренесе Financial Times. Истовремено, тој даде сигнал дека ЕЦБ се уште не е блиску до промена на политиката.

Драги призна дека силата на еврото „добила некое внимание“, велејќи дека „последното нешто кон кое што цели Управниот одбор“ е ненадејна промена на условите за финансирање. Тој, сепак, истакна дека „условите за финансирање како целина остануваат во поддршка на враќање на инфлацијата кон целните нивоа“.

Како што се очекуваше, Франкфуртската финансиска институција ја задржа на нула водечката камата, која е референтна за кредитирањето во еврозоната. Каматата на депозитите е минус 0,4 отсто.

ЕЦБ не ја промени и големата програма за откуп на должничка вредност, која е во вредност од 60 милијарди евра месечно. Банката си остави отворена врата за нејзино зголемување, како и за продолжување на нејзиниот рок, ако е потребно.