ЕУ ќе ѝ даде на Турција сѐ што ќе побара, само под еден услов
Објавено во: Свет 08 Март, 2016
Договорот кој вчера го постигнаа лидерите на ЕУ со Турција е најавен како одговор на сите проблеми на Европа со бегалската криза.
Европската Унија ќе и даде се што ќе побара официјална Анкара, но само под еден услов.
Турција ќе треба да ги земе назад кај себе илјадниците мигранти што влегуваат во Европа, а за возврат ќе добие забрзување на членство во Унијата, безвизен режим и дополнителна финансиска помош.
Освен тоа, за возврат, ЕУ ќе прифати илјадници сириски бегалци и ќе ги носи по безбедни рути, далеку од опасните чамци и од рацете на шверцерите.
На Турција ќе и биде дадено двојно повеќе финансиска помош од претходно ветената од 3 милијарди евра со цел да им се помогне на мигрантите кој остануваат во земјата.
Европа, исто така, ќе ја плати сметката за транспортот на бегалците меѓу ЕУ и Турција.
Претседавачот на самитот претседателот на Советот на ЕУ Доналд Туск ќе треба да да утврди колку земји членки на ЕУ се подготвени да дадат пари.
Лидерите на ЕУ и Турција го поздравија договорот за интензивирање на соработката за да се намали бројот на бегалците во Грција и се договорија да се видат на 17 март за да ги договорат деталите.
Но, од друга страна голем дел од Европскиот парламент го критикува договорот, а само демо-христијанската група брани некои од одлуките на самитот.
Останатите, како на пример европските либерали, ја критикуваа Европа дека и се „поклонила” на еден авторитарен режим и дека договорот личи на „пазар на кој ќе се продадат европските вредности и принципи”.
Дел од нив беа поумерени, како социјалистите на пример, кои во критиките и сметаат дека договор со Турција мора да има но дека тоа треба да биде соработка а не договор во кој едната страна дава а другата само зема.