EУ ќе бара најмногу за две години Косово и Србија да ги затворат спорните прашања?
Објавено во: Балкан 27 Јануари, 2018
Сеопфатната нормализација на односите на Србија и Косово, во форма на правно обврзувачки договор, за Европската Унија е „итна“, се наведува во работната верија на стратегијата на ЕУ за проширување.
За помалку од две години Белград и Приштина треба да ги затворат сите спорни теми, што делува преамбициозно, имајќи го предвид темпото на досегашниот дијалог.
Според Вечерње новости, чии новинари имале увид во документот кој официјално треба да биде претставен во февруари, договорот меѓу Белград и Приштина е од суштинска важност за европската перспектива и на Косово и на Србија, но и на поширокиот регион.
Се истакнува дека високата претставничка на ЕУ Федерика Могерини ќе го интензивира својот ангажман во олеснувањето на преговорите меѓу Приштина и Белград со цел да се постигне нормализација на односите во форма на правно обврзувачки документ.
Стратегијата содржи и „индикативна илустрација“ на чекорите потребни за завршување на процесот на пристапување на Србија во ЕУ до 2025 година, што го претставува најдоброто сценарио. Така, најдоцна до крајот на 2019, меѓу другото, Белград треба да ги исполни преодните мерки во рамки на поглавјето 35, кои се однесуваат на Косово.
Во документот стои и оваа формулација: „Србија и Косово треба најдоцна до оваа фаза да остварат сеопфатна нормализација на односите, што би требало да го отвори патот за понатамошен суштински напредок на Косово на патот кон европските интеграции“.