Еве зошто се одбиени барањата за притвор во „Титаник“
Објавено во: Македонија 25 Јули, 2017
Апелација ги објави одлуките за одбивањето на мерките притвор за обвинетите во случајот „Титаник“.
Станува збор за Никола Груевски, Миле Јанакиески, Гордана Јанкулоска, Мартин Протоѓер и Кирил Божиновски.
Во образложението за Груевски стои дека бидејќи на обвинетиот му е одземена патната исправа и службениот пасош и мора секој петок да се јавува во судот, нема опасноста од бегство.
Можноста Груевски да влијае врз сведоци е неоснована.
За поранешната министерка за внатрешни работи, Гордана Јанкулоска е наведено дека опасноста од попречување на кривичната постапка со влијание врз сведоците и соучесниците е неоснована. Се дополнува и дека обвинетата подолг временски период не ја врши наведената функција.
Во петокот на јавна седница обвинетите си ги побараа назад одземените пасоши и ветија дека нема да бегаат. Тие се жалат дека судот им определил престрога мерка. Ги оценија обвиненијата на СЈО како „празни“ и тврдат дека ова обвинителство прави политичка хајка против ВМРО-ДПМНЕ.
Во случајот „Титаник“ СЈО гони поранешни високи функционери на ВМРО-ДПМНЕ за изборни нерегуларности.