Европската комисија го поздрави разрешувањето на Јово Вангеловски
Објавено во: Македонија 02 Март, 2020
Европската комисија во својот извештај за исполнувањето на условите за преговори, кој е основата врз која земјите членки на ЕУ треба да одлучат овој месец дали ќе дадат зелено светло за нивно започнување за Македонија, го поздравува разрешувањето на Јово Вангеловски како претседател на Врховниот суд.
Во истиот се вели дека Македонија остварила значаен напредок во сите области и му препорачува на Советот да донесе позитивна одлука, а меѓу успесите од изминатиот период се набројани уште разрешувањето на шестмина судии на функција, префрлањето на предметите на СЈО во редовното Јавно обвинителство, каде се гарантира континуитет на истрагите и усвојувањето на законот за Јавно обвинителство со двотретинско мнозинство по „интензивни дебати меѓу политичките партии“.
Судскиот совет го разреши претседателот на Врховниот суд Јово Вангеловски по две години неуспешни обиди да се најде мнозинство за негово разрешување. Разрешен беше со 8 гласа „за“ за несовесно вршење на функцијата. Предлогот за разрешување на врховните судии беше поради незаконската постапка околу овозможувањето на Сеад Кочан да се брани од слобода.
Извештајот треба да се објави најрано денес, а најдоцна до крајот на оваа недела. МИА доби пристап до овој кус документ во кој Европската Комисија го разгледува напредокот во клучните реформски области што ги бараат земјите членки.
Европската комисија порачува дека оценката од 2019 не е променета и дека Северна Македонија треба да започне преговори со ЕУ. Извештајот е фокусиран на судските реформи, судењата за висока корупција, вклучително и случајот со СЈО, безбедносните реформи и реформите во јавната администрација.