Фицо бара ист квалитет на храната насекаде во Европа
Објавено во: Свет 10 Март, 2017
Премиерот на Словачка, Роберт Фицо е задоволен што на самитот на Европската Унија вчера во Брисел се пробила и темата за полошиот квалитет на храната и другите производи за „новите“ Европејци, иако земјите од Вишеградската четворка не успеаја во целост таа пракса да ја забрани Европската комисија.
Фицо вели дека со ова нивната мисија е делумно исполнета.
„ЕУ мора да потврди дека ќе преземе мерки да се елиминира негативната пракса со која никој не може да се сложи. Можеби тоа предизвикува нервоза кај некои претставници на Европската комисија, дека не сакаат да се занимаваат со кечап, но јас одговарам дека тоа е пред сѐ политички а не технички проблем. Станува збор за кредибилитетот на ЕУ како институција“- кажа Фицо по самитот.
Земјите од Вашиградската група на последниот самит го нагласија проблемот на вообичаената пракса на наднационалните компании да произведуваат и продаваат ист производ под исто име со еден квалитет и одредени состојки за Западот, а сосема други, забележливо полоши, иако најчесто не се поевтини, за посткомунистичките членки на ЕУ и нивните соседи како регионот Западен Балкан.
На страната на новите Европејци кои одбиваат да им се продава шкарт храна застана и еврокомесарката задолжена за правата на потрошувачите, Вера Јоурова од Чешка, особено по најновите словачки анализи на над 20 производи од продавници во Австрија и Словачка која докажала дека производите за Словаците имаат помал процент месо, повеќе вештачки додатоци, посиромашни се по состојките од истите производи за Австријците.
Досега на сите предупредувања, пред сѐ од Чешка која веќе неколку години прави анализи, произведувачите и самата Европска комисија одговараат дека за различниот состав е наводно виновен вкусот на потрошувачите, а дека ЕУ доволно се обврзува да се наведат сите состојки, и дека потрошувачот знае што купува.