Филипче: За Велигден барам само разбирање за сите ограничувања кои ги наметнавме
Објавено во: Македонија 19 Април, 2020
Венко Филипче, министерот за здравство, во велигденската честитка побара разбирање од граѓаните за мерките со кои се ограничува движењето преку уредбите кои ги носи Владата. Како што вели министерот, колективното е поважно од индивидуалното.
„Драги пријатели, Ви го честитам најголемиот христијански празник, и ви посакувам многу, здравје, радост, успех и слога! Оваа година прославуваме различно, без големи собири и дружења. Но, празникот е време да се потсетиме кои работи се важни во животот и да се потсетиме на вистинските вредности. Една од најважните работи кои секогаш е дел од сите честитки, е доброто здрваје.
Иако редовно го посакуваме, често забораваме да го заштитиме или да се грижиме за него. Нека овој празник не потсети колку е важно да се грижиме за нашето здравје, но и здравјето на сите околу нас. Колку е важно да сме одговорни за себе, но и за другите. Колку е важно колективното наспроти индивидуалното. Сакам уште еднаш да ви се заблагодарам за тоа што ги почитувате мерките и што секој придоенсува да го заштитиме јавното здравје.
Ви посакувам добро здравје и мир. Од вас барам само разбирање за сите ограничувања кои ги наметнавме, тие беа исклучиво во заштита на здравјето на сите. Нека ни е честит празникот“, се вели во честитката на Филипче.