ФОКУС НА ДЕНОТ: Maкедонија ја „тресат“ апсења, Бугарија го ратификуваше Протоколот
Објавено во: Македонија 20 Февруари, 2019
Против петмина осомничени за „крвавиот четврток“, Основното јавно обвинителство поведе истражна постапка, а меѓу нив е и поранешниот премиер, Никола Груевски.
Обвинителството до Основниот суд Скопје 1 – Скопје доставил предлог за определување мерка притвор за осомничените Трајко Вељаноски, Миле Јанакиески, Спиро Ристовски, Никола Бошковски и Никола Груевски.
Осомничените Вељаноски, Јанакиески и Ристовски веќе се приведени, додека Бошковски и Груевски се во бегство.Со 140 гласа „за“ бугарското Собрание го ратификуваше пристапниот Протокол за прием на Македонија во НАТО.
Со тоа Бугарија е четвртата земја која го одобрува членството на Македонија во Алијансата, по Грција, Словенија и Албанија. Останува истото да го сторат уште 25 земји-членки, а според најавите следна е Црна Гора.,
Како гостин во народното Собрание беше и претседателот на македонскиот парламент Талат Џафери, а говор одржа и министерката за надворешни работи Екатерина Захариева.
Екатерина Захариева, министерката за надворешни работи на Бугарија, се обрати пред пратениците во Народното Собрание пред изгласувањето на пристапниот Протокол за прием на Македонија во НАТО и кажа дека двете земји заедно ќе се развиваат економски.
- Членството во НАТО бележи нова етапа во односите на двете држави. Од првостепена важност останува да биде подобрувањето на заедничката инфраструктура, изградба на прекугранични патишта и магистрали. На тој начин инвеститорите ќе можат да откријат нови можности во развојот на двете економии“, рече Захариева во својот говор.
Се коригираат слабостите по укажувањата од јавноста, а веќе е побарана помош од граѓански организации за поставување систем на вредности, изјави денеска премиерот Зоран Заев, за постапувањето на функционерите по неговиот повик за повлекување од работните позиции по реакците за јавноста за непотизам.