ФОКУС НА ДЕНОТ: Meркел против датум за преговори за Македонија, Груевски „откачи“ унгарски новинар

Добивај вести на Viber

„Зидојче цајтунг“ објави дека германската канцеларка Ангела Меркел се произнесла против идејата Македонија ова лето да добие Датум за преговори со Европската унија, откако гласилото се повика на свои извори.

Меркел на седница на Комисијата за европска политика на Бундестагот рекла дека одлука за датумот за преговори на Северна Македонија за приклучување во Европската унија е можно да се донесе „најрано во октомври“.

„Михаел Рот од СПД во Комисијата за европска политика во вторникот категорично се залагал за почеток на преговори за приклучување, но не наишол на 'отворни уши' кај ЦДУ и ЦСУ.“, пишува Зидојче цајтунг, според кого министерот за надворешни работи не наишол на разбирање кај лидерите на партиите од владеачкото мнозинство.

Поранешниот македонски премиер  Никола Груевски кој доби политички азил во Унгарија, денеска повторно беше пречекан од унгарски новинари во Будимпешта.

„Се извинувам, денеска нема да дадам изјава. Во некоја друга прилика ќе ти дадам изјава“, му одговари Груевски на унгарскиот новинар.

Новинарот инсистираше и му рече дека има само неколку прашања за него, но тој одби да зборува. Го прашуваше дали работи и како сега живее во Будимпешта. 

Груевски се појавил пред зградата 444 на Булевар Магрит и влегол во еден од становите.

Поранешниот премиер Никола Груевски својата оставка како пратеник ја депонираше преку нотар во Собранието, потврди спикерот Талат Џафери.

Заверената оставка пристигнала во средата на 5-ти јуни. Се очекува нејзиното прифаќање да се најде на дневен ред на следната собраниска седница во вторник, иако имаше негодувања од владеачкото мнозинство дека тој треба тоа дда го стори лично, а не од Будимпешта, каде што е азилант по бегството од затворската казна.

Џафери потврди дека оставката е пристигната со нотарски акт и со соодветни печати со кои се потврдува дека станува збор за лична изјава на Груевски.

Нема датум за преговори со Македонија во нацрт-заклучоците од претстојниот Совет на ЕУ, јави дописничката на МИА од Брисел.

ЕУ признава дека Македонија ги исполнила условите за почеток на преговори. Земјите членки на ЕУ ги набројуваат во детали исполнетите услови поставени лани, како што се реформите во судството, во разузнавачките служби, јавната администрација и борбата против корупцијата.

Уште еднаш ги поздравуваат билатералните договори со Бугарија и Грција, и потенцираат дека Преспанскиот договор е „пример за другите во регионот“.