ФОКУС НА ДЕНОТ: Се чека исходот од лидерската, Венгеловски разрешен

Добивај вести на Viber

Се очекува исходот од лидерската средба која се одржува вечерва помеѓу претседателите на СДСМ и ВМРО-ДПМНЕ, Зоран Заев и Христијан Мицкоски. 

За лидерот на СДСМ и во исто време премиер на земјава, Зоран Заев, легитимно право е опозицијата да бара предвремени избори, исто како што е право на сегашната власт да процени кој е приоритетот на државата во време кога, како што вели тој, се очекува датум за почеток на пристапните преговори со Европската унија.

„Тоа е легитимно право опозицијата секогаш да бара избори, немам дилема за ниту едно прашање за кое можеме да разговараме. Нормално, нашиот став е она што е во интерес на државата. Мислам дека ова е невиден позитивен момент за нашата земја, време кога го чекаме датумот за почеток на преговорите, за полноправно членство во НАТО, треба да им дадеме шанса на владеењето на правото и економијата, затоа го кажав ова дека мандатот треба да биде завршен до крај. Тие повикуваат на предвремени избори, мојот коментар беше во ред, нека биде крајот на октомври 2020 година и остануваме на оваа позиција “, рече денес Заев.

Советот на судии на денешната седница го разреши Јово Вангеловски од функцијата претседател на Врховниот суд поради неговата непрофесионална работа. Ќе остане запаметен по толкувањето на овој суд според кое не треба да има разрешница за истрагите на СЈО отворени по јуни 2017. За вршител на должност на негово место е назначен Фаик Арслани.

Специјалното јавно обвинителство излезе со соопштение во јавноста во кое ја истакнува својата загриженост за иднината на овој правосуден орган, бидејќи се уште не е избран нов лидер на местото на притворената специјална обвинителка Катица Јанева без чие овластување не може да работи овој правосуден орган.

„Во врска со актуелните случувања сакаме да ја информираме јавноста дека сѐ уште немаме добиено писмен допис од страна на Јавното обвинителство на РСМ за да можеме да известиме дали и како ќе се постапува со предметите на ова Јавно обвинителство. Воедно, во оваа прилика сакаме уште еднаш да ја изразиме нашата загриженост поради фактот што до овој момент ниту е избран јавен обвинител кој ќе ја замени Јанева, ниту пак е донесено ново законско решение со кое што ќе се регулира статусот на ова Јавно обвинителство. Потсетуваме дека мандатот на СЈО е до 15 септември 2020 година, до кога продолжуваат работниот однос на вработените во Обвинителството и тековните обврски на институцијата“, велат од таму.

Правосудниот орган смета дека без раководно лице, не може да се исполнат обврските кон вработените, ниту да се обзебедат материјалите за работа.

Допрва ќе следи префрлување на предметите од СЈО кон ЈО и затоа треба во текот на овие денови да се договорат деталите. Потоа секој од предметите ќе биде распределен во надлежно обвинителство и процесите треба да почнат. Државниот јавен обвинител Љубомир Јовески во изјава за МИА вели дека има надеж дека овој процес ќе тече брзо. Тврди дека ЈО има капацитет да постапува по сите кривично правни предмети од СЈО.