ГИ НАЛУТИ „ГОЛЕМА МАКЕДОНИЈА“: Дали Коѕиас ќе дојде во Скопје?
Објавено во: Балкан 21 Август, 2017
Грчкото Министерство за надворешни работи се двоуми дали министерот Никос Коѕиас треба да ја посети Македонија.
Причина се последните „провокации“ на македонски функционери со мапа на „Голема Македонија“, пишува грчкиот портал „Њуз 24/7“.
„Одлуката на министерот за надворешни работи да го посети Скопје кон крајот на август, како што вети на средбата со неговиот колега Никола Димитрив во Атина, се преразгледува. Причината е последниот напад врз Грција на настан во Торонто на кој присуствуваа владини функционери на Скопје“- пишува „Њуз 24/7“.
Атина на 16 август ја обвини македонската Влада дека го прекршила привремениот договор меѓу двете земји од 1995 година, откако генералниот конзул на Македонија Јовица Палешевски наводно „на официјален настан во Торонто говорел на позадина која содржела иредентистичките симболи и мапи“.
Тогаш Грците реагираа дека иако новата Влада тврди дека се стреми кон нов почеток во односите со Грција, и покрај промената на власта, сметаат дека иредентизмот и понатаму е доминантна државна идеологија.
„Одрекување од иредентизмот, почитување на границите и практична примена на принципите за добрососедство се неопходни услови за реализација на евроатлантските аспирации на ПЈРМ“- стоеше во соопштението на грчкото МНР.
„Њуз 24/7“ пишува дека македонското МНР побарало потврда за намерата на Коѕиас да ја посети нашата земја на 31 август, но до синоќа „не добиле дефинитивен одговор“.