Ѓоргиев: Ставовите на Бугарија за јазикот придонесуваат и ние да го дигнеме гардот
Објавено во: Македонија 03 Мај, 2020
Ако услов за почнување преговори со Европската унија е откажување од македонскиот јазик, тогаш такви преговори не треба ни да почнат, смета првиот човек на македонскиот тим на мешовитата комисија, изјави Драги Ѓоргиев, претседател на македонскиот тим експерти во заедничката македонско-бугарска Комисија за историски и образовни прашања, за Канал 5 телевизија.
Според него, тензијата што се создава меѓу Македонија и Бугарија во однос на идентитетските прашања може само да влијае лошо врз понатамошната работа на Комисијата.
Ставовите на Бугарија, вели тој, придонесуваат за македонската страна да го крене гардот со чувство на недоверба кон Бугарија и бугарската политика, бидејќи македонскиот јазик е реалност и ниту бил ниту ќе биде тема на разговор во работата на комсијата.
„Според мене, Македонија апсолутно не треба да дискутира и да го стави на маса јазикот. Тоа е апсолвирано прашање, реалноста и постоењето на македонскиот јазик, и тука Македонија воопшто не треба да ја отвора таа тема ниту да го држи отворено тоа прашање. Колку и да се блиски овие два јазици, колку и да не ни требаат преведувачи кога разговараме со бугарска страна, станува збор за два јазици и од тој аспект не смее да се дозволи апсолутно никаква дискусија за македонскиот јазик, тоа е завршена работа“, нагласи Ѓоргиев.