Има ли скриена причина: Имунитетот на Вељаноски во рацете на Џафери
Објавено во: Македонија 25 Февруари, 2019
Во следните неколку дена претседателот на Собранието, Талат Џафери ќе соопшти што ќе се случи со седницата на која точка на дневен ред е одземањето на имунитетот на пратеникот Трајко Вељаноски. На полноќ синоќа Џафери ја прекина седницата на која пратениците дебатираа за одземање на пратеничкиот имунитет на неговиот претходник на која доминираше тензична атмосфера.
Пратениците од опозицијата тврдеа дека нема потреба од ваква седница затоа што Комисијата за деловнички и мандатно - имунитетни прашања немаше заклучок за одземање на имунитетот. На комисиската расправа четворица пратеници беа за одземање на имунитетот, но исто толку беа и против.
„Да, има извештај, но нема предлог заклучок од комисијата. Што тогаш Џафери ќе стави на гласање? Оваа седница е чудна работа, неразумна е,штом нема предлог заклучок нема ни точка за расправа, изјави пратеникот од ВМРО-ДПМНЕ Илија Димовски.
Претседателот на Комисијата Павле Богоевски рече дека треба да се постапува по собраниски правила и да се расправа за ова прашање.
„Која е одлуката да расправа собранието за одземање на имунитет ако комисијата изгласа против, а не може да расправа ако изгласа нерешено. Со должна почит кон вас, но Собранието може да преживее и без Трајко Вељаноски“, рече Богоевски.
Синоќешната седница беше прекината откако претходно процедурално се јави координаторот на ВМРО-ДПМНЕ Никола Мицевски кој побара, но не му беше одобрена паузата од еден час.