Јанушев: ВМРО-ДПМНЕ нема никогаш да го признае овој неуставен закон и некој ќе одговара за ова
Објавено во: Македонија 16 Март, 2018
Игор Јанушев, генерален секретар на ВМРО-ДПМНЕ на прес-конференција изјави дека СДСМ ја погази демократијата, Уставот и законите, само за да изгласа закон кој ќе им овозможи да останат на власт без разлика што при пазарењето за зачувување на коалицијата.
ВМРО-ДПМНЕ не го признава и нема никогаш да го признае овој неуставен закон. ВМРО-ДПМНЕ уште еднаш истакнува дека некој ќе одговара за ова што го стори, нагласи Јанушев
„СДСМ и ДУИ ги прекршија членовите 67 и 75 од Уставот на Република Македонија кои велат дека првиот човек на Собранието мора да се грижи за правилна примена на деловникот, додека членот 75 предвидува во случај на непотпишување на указот, законот да биде повторно разгледан од пратениците“ - вели Јанушев.
Тој наведе дека ништо од ова не се случило. Генералниот секретар на ВМРО-ДПМНЕ потенцираше дека ова што го направиле СДСМ и ДУИ е силување на демократијата, покажување брутална моќ и сила.
„Она што го направија СДСМ и ДУИ е потценување на интелигенцијата на македонскиот народ! Владејачкото мнозинство покажа дека на Собранието гледа како на гласачка машина, која безпоговорно треба да ги гласа законите кои ќе бидат сервирани. СДСМ ја обезвредни улогата на Собранието и го поништи уставното право на пратениците, со амандмани да интервенираат во законските предлози. Власта ги игнорираше укажувањата на претседателот на државата за неуставноста на законот, власта ги игнорираше укажувањата на експертите, политичките чинители и општата јавност на Република Македонија. Партијата која од опозиција ветуваше дебата на секое прашање сега на сила и на крајно игнорантски оневозможи било каков вид на дебата и на сила се обиде да истурка еден штетен, неприменлив и неуставен закон, кој дополнително ќе ги продлабочи разликите во нашето општество“ - вели тој.
Јанушев додаде дека владејачкото мнозинство ја загрози евроатлантската иднина на оваа држава.