КАТИМЕРИНИ: Грција загрижена, „Србија бесна поради односите на Македонија и Косово“

Добивај вести на Viber

Грчките дипломати загрижено го следат развојот на настаните на Балканот, откако Србија го повлече целиот персонал од својата амбасада во Скопје.

Тоа го пишува грчкиот весник Катимерини во онлајн изданието.

Катимерини истакнува дека Белград ги повлекол дипломатите од амбасадата откако ја обвинил Македонија за „офанзивно дејство“ против Србија.

Грчкиот сајт наведува дека Белград изгледа бесен, бидејќи Скопје ги унапредува односите со Приштина.

Катимерини забележува дека спорот следи во време кога Македонија се обидува да ја оживее својата кандидатура за придружување во Европската унија и НАТО, по период кој го одбележаа политички превирања.

Грчкиот весник потсетува дека македонскиот премиер Зоран Заев формирал коалициона влада во јуни, речиси шест месеци по изборите во земјава.

Се нагласува и дека Грција инсистира спорот со Македонија околу името да се реши пред државата да им се придружи на меѓународните сојузи.

Македонската влада претходно соопшти дека при одлучување за членството на Косово во УНЕСКО ќе ги земе предвид ставовите на повеќето земји на ЕУ.

Владата на Заев меѓутоа, соопшти дека „развива пријателски односи со сите соседни земји“, дека во случај на отворени прашања „води политика на добрососедска и регионална соработка“, но дека, што се однесува до гласањето за членство на Косово во УНЕСКО „ќе ги земе предвид ставовите на повеќето земји од ЕУ“.