Коѕиас: Нестабилната ситуација во Скопје се должи на недостиг на компромис
Објавено во: Балкан 11 Април, 2017
Грчкиот шеф на дипломатијата, Никос Коѕиас изрази загриженост за стабилноста на Македонија.
Тој вели дека „нестабилната ситуација во Скопје, во голема мера се должи на недостиг на култура на компромис и консензус“.
Во својот говор на настан организиран од страна на Движењето на идеи и акција ПРАТТО, со кое тој претседава, Коѕиас синоќа се осврна на повеќе прашања.
Во врска со Турција, тој рече дека таа е „нервозна сила“ и дека изјавите со кои се фрла сомнеж врз Договорот од Лозана „кријат тенденција за ревизионизам“. Во однос на Албанија, тој ги повтори петте услови утврдени и прифатени од страна на ЕУ, со цел Тирана да добие датум за почеток на пристапни преговори.
„Во свет кој претендира да ги загуби своите координати и маршира кон хаотични ситуации, Европа не ги сфати промените, или фактот дека иднината на ЕУ зависи од стабилноста во поширокиот регион“ - вели Коѕиас.
Критикувајќи ја ЕУ, тој рече дека Унијата „не може да се развие во алатка за казнување, без визија“, додавајќи дека се оддалечила од вредностите на солидарност. Тој истакна дека сака „социјална Европа, со користење на човекот како мерка“.
Коѕиас смета дека ЕУ нема визија и ориентација.
„Таа се стреми да стане еден вид империја, како нов Рим и не може да одговори на повеќе кризи: финансиската, должничката криза, потчинување на пазарите, недостигот на институции, подемот на национализмот, бегалската криза, Брегзит, нејзините односи со Турција“ - рече Коѕиас.
И најважниот дел: ЕУ се соочува со криза во справувањето со кризи, истакна шефот на грчката дипломатија.