Коѕиас вели го наследиле проблемот со името, но се сериозни во решавање
Објавено во: Балкан 08 Јануари, 2018
Грчкиот шеф на дипломатијата, Никос Коѕиас на владината седница ги презентирал позициите за преговорите за името.
Коѕиас рекол дека грчката позиција е име со географска одредница за севкупна употреба.
Коѕиас изјавил дека конкретното прашање оваа Влада го наследила и затоа во минатото не биле преземени иницијативи, но нагласи дека оваа Влада е сериозна, како и дека има храброст да оди кон решавање на проблемите.
„Министерот за надворешни работи во неговото обраќање го извести Министерскиот совет за позициите со кои грчката страна учествува во преговорите за името со ПЈРМ. Коѕиас рече дека националната позиција беше веќе претставена во 2007-2008 и се однесува на сложено име со географско потекло и за севкупна употреба“- пишува грчката новинска агенција.
Министерот ги претставил и конкретните предлози за името, а освен министерот за надворешни работи, на седницата за прашањето за името не говорел ниту еден друг министер, пренесува АПЕ-МПЕ.
Грчката телевизија Скај на нејзиниот сајт објави дека Коѕиас во неговото обраќање не споменал конкретни предлози за името.