Коронакриза: Силен пад на индустриското производство во март
Објавено во: Економија 30 Април, 2020
Колку е силен ефектот на коронакризата за македонската економија - првиот статистички факт е за индустриското производство. Државниот завод за статистика објави дека во март индустриското производство е намалено за 13,4 отсто во споредба со истиот месец лани. Најголем е падот во преработувачката индустрија - дури 14,3 проценти. Познавачите очекуваат уште посилен пад во април и во мај.
Според статистиката индустриското производство во секторот Рударство и вадење на камен во март 2020 година, во однос на март 2019 година, бележи опаѓање од 10,8 отсто, во секторот Преработувачка индустрија има пад од 14,3, а во секторот Снабдување со електрична енергија, гас, пареа и климатизација производството опаднало за 11,5 отсто.
„Намалувањето на производството во секторот Преработувачка индустрија е резултат, пред сѐ, на намаленото производство на пијалаци, на тутунски производи, на текстил, на облека, на други неметални минерални производи, на метали, на електрична опрема, на машини и уреди, неспомeнати на друго место и на моторни возила, приколки и полуприколки, стои во соопштението.
Според главните индустриски групи, производството бележи опаѓање кај Енергија за 12 отсто, Интермедијарни производи, освен енергија за 11,9, Капитални производи за 20,1, Трајни производи за широка потрошувачка за 7,8 и Нетрајни производи за широка потрошувачка за 11,1 отсто.