Косово ги „награди“ семејствата на загинатите и осудени лица од Диво насеље
Објавено во: Балкан 07 Февруари, 2018
На 29 семејства во Косово им се исплатени 290.000 евра, односно по 10.000 евра за загинатите и осудени лица во настаните во Куманово од мај 2015 година.
Со ова косовското Министерство за финансии ја реализираше одлуката на Владата за загинатите и осудените за настаните во кумановската „Диво насеље“.
Одлуката на премиерот Рамуш Харадинај тогаш наиде на критика во косовската јавност, со потсетување дека лицата се осудени од судот во Македонија, за неколку кривични дела - како нарушување на уставниот поредок, тероризам и терористичка организација, и затоа доделувањето средства на нивните семејства е несфатливо.
Според медиумите во Приштина, Косово еден месец пред настаните од 2015-та година во Куманово, во парламентот го донесе Законот за забрана за учество во вооружени конфликти надвор од територијата на државата.
На 2 ноември лани скопскиот Кривичен суд пресуди доживотни казни на седум обвинети, 12 обвинети добија по 40 години затвор, шест по 20 години, еден беше обвинет на 18 години, двајца на 14 години, двајца на 13 години и двајца на 12 години. Четири лица беа ослободени од обвиненијата. На 3 ноември имаше протести во Приштина.
Во пукањето на 9 и 10 мај во 2015 година во Куманово загинаа осум припадници на македонската полиција и 10 лица од вооружената група.