Костадинов од Скопје порача дека треба да бидеме една држава од Црното Море до Охридското езеро

Добивај вести на Viber

Македонија е втора бугарска држава, вели бугарскиот пратеник Костадин Костадинов на отворањето на Културно-информативниот центар на Бугарија во Скопје. 

Кажа дека треба да бидеме една држава, која ќе се протега од Црното Море до Охридското Езеро.

„Секој Бугарин во Бугарија ја сака Македонија, ние сме еден народ, зборуваме еден јазик и имаме заедничка култура. Јас ништо не ве убедувам, имате глава на рамењата. Јас ви велам ли како да се чувствувате? Зошто тогаш на луѓето тука, кои сакаат да се чувствуваат како Бугари, им забранувате така да се чувствувааат? Со вас зборувам еден ист јазик, се разбираме. Јас немам против да се чувствувате како Македонци“, рече тој.

Костадинов и неколкумина негови колеги од партијата во центарот на Скопје ги негираа македонската посебност и историскиот факт дека тогашна фашистичка Бугарија нѐ окупирала, а не нѐ ослободила како што сметаат тие.

„Бугарија и Македонија воделе војна, кога било тоа? Имавте ли држава во Втората светска војна? Дајте ми документи каде што има окупација. Тука се создадени комитети што ги пречекале бугарските војски. Кој ги избрка германските војски, нашите војски ве ослободиле“, рече тој. 

На прашањето дали треба да се извини за своите изјави што среде Скопје вели дека Македонија е бугарска, тој рече дека не сака да лаже.

Министерството за надворешни работи ги осудува иредентистичките изјави кои содржат и територијални претензии кон Република Северна Македонија изкажани јавно и повеќе пати од страна на бугарскиот пратеник и лидер на политичка партија, Преродба, Костадин Костадинов.

„Фактот што овие изјави се повторуваат, овојпат и во Скопје и тоа на значаен и за двете страни симболичен повод, отворање на нови канцеларии на Културно-информативниот центар како и во пресрет на Бизнис форумот меѓу Северна Македонија и Бугарија, не можеме, а да не ги толкуваме како обиди за минирање на силните напори на двете Влади за унапредување на соработката и како организирана провокација, која треба да биде осудена од сите проевропски политички структури и институции во двете држави“, се наведува во соопштението на МНР.

Повикаа граѓаните да не подлегнуваат на провокации.  Пратеникот истото го  изјавувал и претходно во Бугарија. 

Инаку, Стојко Стојков од ОМО Илинден Пирин за бројката на Македонци на пописот во Бугарија вели дека е нереална.