Кривична за Мерсиха Смаиловиќ и шест други лица, му се заканувале на Апасиев
Објавено во: Македонија 02 Октомври, 2020
Лидерот на партијата Левица Димитар Апасиев, ќе ја тужи активистиката Мерсиха Смаиловиќ.
Тој заедно со неговиот адвокатски тим до Основното јавно обвинителство Скопје поднесе кривична пријава против Мерсиха Смаиловиќ од Скопје и уште шест други лица кои, како што е наведено, му се закануваат нему и на членовите на неговото поблиско семејство.
Наводите од пријавата, информираат од партијата, се пријавени и до надлежните инспектори во СВР Скопје од Одделението за борба со компјутерски криминал.
„Кривичната пријава е поднесена поради постоење основи за сомневање за сторено тешко кривично дело: „Ширење на расисистички и ксенофобичен материјал по пат на комјутерски систем" казниво по член 394-г, ст. 1 од Кривичниот законик, како и за сторено кривично дело „Загрозување на сигурноста" – казниво по чл. 144, ст. 4, а во врска со чл. 23 од КЗ (поттикнување)", се вели во соопштението од Левица.
Од партијата очекуваат брзо постапување на Обвинителството.
Апасиев претходно кога беше повикан во обвинителството кажа дека нема да запре со своите статуси на Фејсбук, па дури и дека е подготвен да оди в затвор.
Тој во таа прилика кажа дека трпел закани.