Гулевска: Пандемијата ја зголеми свеста за здравата исхрана и здравите навики

Добивај вести на Viber

Поради пандемијата на коронавирусот, луѓето се свртени кон себеси и повеќе внимаваат на здравата исхрана и здравите навики за да имаат подобар имунитет.

За оваа цел  бараат помош од стручни лица. Нутриционистот Фани Гулевска вели дека ова е позитивна промена која настана поради ширењето на коронавирусот. Таа објаснува дека стравот придонесе луѓето да се менуваат.

„Луѓето се јавуваат, прашуваат како да се хранат, како да си го подобрат имунитетот. Зголемена е свеста за здравата исхрана, посебно сега кога ни е ограничено движењето. Сега луѓето имаат време да размислат за себеси, да решат некои проблеми, затоа што претходно, сѐ беше важно освен здравјето. Ги советувам луѓето да имаат баланс, да внесуваат овошје, зеленчук, лесна храна. Да не внесуваат повеќе храна од она што можат да потрошат. Сега во лето ќе имаат поголем избор на овошје и зеленчук. Но, многу е важно да не бидат под стрес, затоа што дигестивниот систем не ја вари храната кога сме под стрес. Ова „чудо“ нѐ натера да сфатиме дека здравјето е на прво место. Многу фирми пропаднаа, но џабе се парите, ако го немаме здравјето“, вели Гулевска.

Од продавниците за здрава храна велат дека откако коронавирусот се појави во земјава, имале наплив на купувачи кои барале здрави намирници, но и создавале залихи. Купувале сѐ, од брашно, до суво овошје и различни типови здрави семиња.

Што се однесува до навиките, СЗО ги предупредува луѓето да се откажат од пушењето затоа што пушачите се поранливи кога се работи за инфекција со коронавирус, а откриено е дека некои рутински движења карактеристични за пушачите се изложени на поголем ризик од инфекција со коронавирус.

Досега, многу лекари ширум светот истакнаа дека пушачите се изложени на поголем ризик од развој на компликации предизвикани од коронавирус.

Во Македонија Ковид – 19 е дијагностициран кај повеќе од 5.300 луѓе, а бројот на починати е над 250.

Македонија се соочи со карантин, и вонредна состојба на територија на цела држава која неколку пати беше продолжувана.

Најпогодени од болеста се луѓето на возраст над 60 години, но имаше и млади жртви.