Љупчо Димовски: Најголемата винарска визба во Македонија ќе го намали откупот, другите поголеми нема да работат и одат на продажба

Добивај вести на Viber

Поранешниот министер за земјоделство Љупчо Димовски на својот профил на Фејсбук објави дека за престојната сезона на откуп на грозје „најголемата винарска визба во Македонија драстично ќе го намали откупот, а другите поголеми или нема да го вршат или ќе бидат затворени“. Пратеникот додава дека една се продава, а друга нема пари.

„Според неофицијалните информации залихите на наливно вино се скоро исцрпени со договорените аранжмани и негово извезување. Затоа пак, има големо потфрлување во пласманот на флашираното вино, чии што залихи непланирано се големи.
Заради ковид кризата откажани им се договорените испораки и со овој проблем се соочени скоро сите поголеми македонски винарски визби.
Загрижува информацијата што неколку од поголемите винарски визби воопшто нема да вршат откуп. Една од најголемите визби не работи, друга исто така голема винарска визба е во фаза на продажба, трета не е во финансиска кондиција која со што неможе да се покрие откупот на грозје ...
Се очекува и најголемата винарска визба драстично да го намали откупот. Причина се залихите на флаширано вино, сопственото производство на грозје, воспоставените кооперантски релации со лозаропроизводители со кои долги години имаат склучено договорно производство“, објави Димовски во својот последен коментар.

Пратеникот заедно со уште двајца поранешни министри за земјоделство, шумарство и водостопанство Михаил Цветков и Ацо Спасеновски, како и поранешниот заменик-министер Кристијан Делев се под истрага за злоупотреба на службена положба и овластување при доделување на земјоделска помош и давање под закуп државно земјоделско земјиште. Со тоа се товарат дека предизвикале штета од над 1,4 милиони евра на Буџетот.