МАКЕДОНИЈА ПРИЧИНА ЗА ЖЕСТОКА РАСПРАВА: Какви ставови имаат Ципрас и Мицотакис?
Објавено во: Балкан 09 Март, 2018
Жестока расправа за името во грчкиот Парламент имаше меѓу грчкиот премиер, Алексис Ципрас и претседателот на Нова демократија, Киријакос Мицотакис.
Мицотакис тврди дека Владата нема единствена позиција за името. Го праша Ципрас кој ќе ја застапува грчката позиција на самитот на НАТО во јули, дали министерот за одбрана Панос Каменос, кој е против името Македонија или тој како лидер на Сириза.
„Веднаш Ви рековме зошто влегувате во овој разговор кога го немате обезбедено минималниот неопходен предуслов за да има заемно прифатливо решение, а тоа е промена на Уставот. Прво ни се потсмевавте, за да потоа дојдете на нашата линија. Господинот Заев излезе со огромна храброст и побара промена на грчкиот Устав, како одговор на тоа што ние му го кажавме“- рече Мицотакис.
Мицотакис го обвини Ципрас дека во разговорите за името не ја вклучил грчката опозиција и дека протестите против употребата на зборот „Македонија“ ги смета за националистички.
Ципрас рече дека нема отстапки од црвените линии и дека се бара сложено име за севкупна употреба.
„Ние бараме решение за клучното важно прашање за името на соседната држава со два основни предуслови: сложено име за севкупна употреба, а тоа значи дека не може да биде само за надворешна употреба, туку и за внатрешна, односно промена на уставното име“- изјави Ципрас.
Ципрас кажа дека не е првиот грчки премиер што се сретнал со премиер на Македонија, мислејќи на средбата Никола Груевски - Јоргос Папандреу пред осум години.