Маричиќ добил на суд дека не земал мито за Преспанскиот договор

Добивај вести на Viber

Главниот технички преговара со ЕУ од Владата на РСМ, Бојан Маричиќ, објави дека добил во своја корист судска пресуда за медиумско клеветење дека добил пари за учество во преговорите пред потпишувањето на Спогодбата од Преспа со која земјата го промени уставното име.

-Денес добив пресуда во која се утврдува дека Инфомакс изнесува невистини за мене и моето семејство и со тоа ги нарушил моите углед и чест. Пресудата утврдува дека ме наклеветиле кога изнеле НЕВИСТИНА дека сум добил пари за учество во преговорите за Договорот од Преспа од кои сум купил ексклузивен плац во Дебар Маало, објави специјалниот советник во Владата.

Уште еднаш ги демантираше пишувањата во одредени медиуми дека со наводно земените пари за учеството во преговорите за Договорот од Преспа потоа купил ексклузивен плац во Дебар Маало.

- Овие лаги повеќе пати се повторени на повеќе медиуми блиски до опозицијата. Денес тој балон пукна, а јавноста има можност да види кој пласира штетни лажни вести и кој е едниот од начините за справување со овој феномен, пишува Маричиќ.