Мицкоски бара Силјановска и Каракамишева да го напишат Законот за ЈО

Добивај вести на Viber

Христиојан Мицкоски, претседателот на ВМРО-ДПМНЕ, на денешната прес-конференција предложи имиња на шест експерти од кои очекува да го состават предлог-законското решение за Јавното обвинителство.

Две професорски имиња се Гордана Силјановска Давкова и Татјана Каракамишева, а преостанатите се Владо Камбовски, Никола Тупанчевски, Гордан Калајџиев и Гордана Лажетиќ.

Лидерот на најголемата опозициска партија текстот на предлог законот за ЈО да го подготват овие експерти, а не политичарите. Нагласи дека сето она што ќе го договорат таквите тела ќе биде прифатено од партијата која што ја предводи.

„Единствен којшто може тој закон да го направи е експертот кој го посветил сиот свој живот во таа проблематика. И затоа велиме, овие шест имиња се имиња на професори, оставаме и владејачкото мнозинство да предложи имиња на професори и експерти коишто би учествувале во изработка на тој закон. Нека го изработат и ние се обврзуваме како политичка партија, тоа што ќе го изработат да го поддржиме“, рече Мицкоски.

Мицкоски не прифаќа одлагање на изборите доколку не се изгласа законот за формирање на Обвинителството за организиран криминал и висока корупција.

„Законот за јавно обвинителство го користи единствено како изговор за останување на власт, а од изговори е веќе доста“, рече Мицкоски.

Додаде дека власта на сила врбува пратеници за законот да се изгласа со двотретинско мнозинство.

Претседателот на СДСМ, Зоран Заев, претходно рече дека ако треба и изборите ќе се одложат, ама реформските закони ќе бидат изгласани пред распуштање на Собранието.