Мицкоски: Пендаровски во 15.30 часот да ме чека на Водно, доаѓам со сите пратеници на ВМРО-ДПМНЕ
Објавено во: Македонија 13 Август, 2020
Христијан Мицјкоски, лидерот на ВМРО-ДПМНЕ, рече дека заедно со пратеничката група на партијата ќе оди во резиденцијата на Водно за да побара средба со претседателот на Македонија, Стево Пендаровски, и му порача на шефот на државата да биде таму во 15.30 часот.
- Од партиското седиште со цела пратеничка група ќе тргнеме кон резиденцијата на претседателот, а Пендаровски во 15.30 часот да пречека и да не прими мене и уште еден пратеник за да ни објасни како му го додели денеска мандатот на претседателот на СДСМ, Зоран Заев, без докази дека има обезбедено мнозинство за составување на Влада, рече Мицкоски на прес-конференцијата.
Лидерот на ВМРО-ДПМНЕ денешното доделување на мандатот го искоментира како кршење на уставот во кој учесник е претседателот на државата
- Мандатот без доказ може да се додели на кого било, зошто тогаш на СДСМ. Ова не е случаен преседан, Денеска го видовме како го дава мандатот на пратеник кој нема доказ за обезбедено мнозинство во парламентот. За жал Пендаровски покажа дека е пиун и извршител во рацете на Заев, кој самиот призна дека нема мнозинство и деновиве ќе прави поткуп на пратеници. Во 15.30 часот ќе дојдеме кај Пендаровски да ни објасни врз основа на кој доказ го доделил мандатот, наведе Мицкоски.
Тој порача дека Пендаровски претходно самиот рекол дека ќе го додели мандатот само на оној кој има цврсти докази дека има обезбедено парламентарно мнозинство за Влада.