Мијалков повеќе не е во куќен притвор

Сашо Мијалков, поранешниот директор на УБК, ќе се брани од слобода откако не му е продолжен притворот за случајот „Титаник 2“. Претходно му беше укината истата мерка за случајот „Империја“.

Мијалков беше 60 дена во куќен притвор, а понатаму ќе му биде одземен само пасошот и треба еднаш неделно да се јавува во судот до правосилноста на одлуката, откако првостепено е одлучено да биде казнет со три години затвор за влијание на изборните резултати на локалните избори. 

„Со решение на Основниот суд Скопје 1 Скопје при изрекување на пресудата за предметот од обвинителството значен како „Титаник 2“ на обвинетиот му е определна мерка притвор. Со решение на Апелациониот суд во Скопје решението на првостепениот суд е преиначено со тоа што за обвинетиот е определна мерка куќен притвор кој трае до правосилноста на пресудата, а најдолго 60 дена согласно член 481 ст.2 в.в. со член 165 ст.1 т.1 од ЗКП“, соопштија од судот.

Со оглед дека рокот од 60 дена истекува на 6.05.2019 година, советот постапувајќи по службена должност утврдил дека мерката куќен притвор треба да ја укине.