Мила Царовска: Од следната година бесплатен студентски оброк
Објавено во: Македонија 25 Ноември, 2020
Мила Царовска, министерката за образование, презентирајќи го ресорниот буџет за следната година, рече дека во него се предвидени и пари за бесплатниот студентски оброк, проект кој започнува да се имплементира во 2021.
- 900 милиони денари се предвидени за 50.000 студенти и ученици. Овдека влегуваат пари за стипендии и сместување, како и бесплатниот студентски оброк, рече Царовска.
Законот за субвенциониран студентски оброк беше донесен на почетокот од годината, но ќе започне да се применува од 15 септември 2021.
Студентите од државните и приватните универзитети секој ден од министерството ќе добиваат по 120 денари, или месечно вкупно 2.400 денари, за приготвена храна од понеделник до петок од рано претпладне до 20.00 часот навечер од 15 септември до 1 јули.
Министерството за образование треба да склучи договори со угостителите кои ќе ја приготвуваат храната.