Добивај вести на Viber
Пратеникот од ВМРО-ДПМНЕ Антонио Милошоски, кој е претседател на Комисијата за надворешни работи во Собранието, денеска со жесток напад врз вицепремиерот за евроинтеграции Никола Димитров, затоа што вчера не отиде во Собранието на седницата на Комисијата, која тој ја свика и на неа бараше да се утврдат црвените линии на Македонија во однос на бугарските ставови.
Милошоски го нарекува Димитров размазениот МИНИСТЕР.
„Не сакал да го загрозува своето здравје, за да си ја работел работата?! Колку лицемерно, кога се знае дека дел од неговата висока министерска плата, со личен шофер и службено возило ја зема за да работи, меѓу другото, и за давање отчет и пред пратениците, со присуство во Собранието.
Додека илјадници медицински сестри си ја работат својата работа, изложени на ризик од кој се штитат, и така ја заработуваат својата скромна плата, размазениот министер ги потценува со оправдание дека не сакал да дојде да одговори на две прашања во Собранието. Срамота!
Додека илјадници касиерки во самопослуги, новинари, аптекари, келнери, заболекари и службеници се присутни на работа, изложени на ризик од кој се штитат, и така ја заработуваат својата плата, министерот кој зема пет пати повисока плата од нив, не можел да дојде до Собрание на еден час и да им објасни на пратениците што преговарал со Бугарија?!“, вели Милошоски.
Според него, „додека заменик министерот за финансии може 5 дена да седи со пратениците во Собранието и да го брани ребалансот на буџетот, од кој ќерката на размазениот министер зема висока стипендија од 40.000 евра годишно, овој нежниот и своите колеги министри ги понижува со изговорот дека не сакал да дојде во Собрание да не се заразел. Но, порано или покасно, сите министри ќе дојдат во Собрание, па и најразмазениот“, пишува претседателот на собраниската комисија за надворешни работи.