Можности и предизвици за зголемување на конкурентноста на домашните мали и средни претпријатија со цел подобрување на нивната соработка со странските инвеститори
Објавено во: Мои пари 17 Април, 2018
Како да се зголеми конкурентноста на домашните мали и средни претпријатија во насока на подобрување на нивната соработка со странските инвеститори, кој се можностите и предизвиците, се клучните дилеми за кои Советот на странски инвеститори и Стопанската комора на Македонија, заедно со Машинскиот факултет при Универзитетот „Св. Кирил и Методиј“ од Скопје ќе дебатираат на заедничка конференција што се организира во петок 20.4.2018 година.
Идејата е да се лоцираат можностите за поголема соработка меѓу странските инвеститори и домашните компании, со цел да се зацврстат меѓусебните врски, за што ќе бидат презентирани и успешни приказни на веќе воспоставената соработка.
Учесниците на конференцијата ќе имаат можност да добијат повеќе информации и за политиките и мерките на финансиските институции и странските донаторски организации за поддршка на локалните мали и средни компании и за зацврстување на нивните капацитети со цел да станат локални добавувачи.
Конференцијата се организра во рамки на проектот финансиран од фондови на ЕУ, во рамките на Инструментот за претпристапна помош (ИПА) и се спроведува во партнерство со Универзитетот за техника од Виена - Институт за менаџмент во науката, а е поддржан и од Владата на Република Македонија. Проектот ќе трае 24 месеци, а неговата цел е преку подобрување на работењето и конкурентноста на одредени локални компании да се подгне капацитетот за подобра соработка со странските инвеститори во земјата, за да можат да бидат вклучени во синџирот на добавувачи.
На конференцијата на која ќе присуствуваат претставници на странските инвеститори и на македонските компании кои имаат потенцијал да станат нивни локални добавувачи, ќе бидат презентирани и резултати од спорведена анкета за унапредување на конкурентноста на домашните компании, а ќе говори и заменик претседателот на Владата на РМ задолжен за економски прашања и за координација со економските ресори, д-р Кочо Анѓушев.