Мртов коњ закачаен на камион - кому му текна непокриен да го шета низ Скопје
Објавено во: Македонија 28 Јануари, 2020
Јавноста во главниот град денеска е згрозена од фотографијата со мртов коњ, кој е закачен на камион и така вози низ улиците во Скопје.
Оваа фотографијата беше споделена на социјалните мрежи од „Ремедиум Вет“.
Мртвиот коњ, според претпоставките, се носи на депонија. Сепак, голем дел од критиките во јавноста се поради тоа што коњот се транспортира на ваков лош начин, без барем да биде покриен ако ништо друго. Глетката предизвикува згрозеност, а сосема сигурно ја гледале и деца додека коњот шетал низ скопските улици.
Граѓаните, барем според коментарите на социјалните мрежи, се бесни.
„Не можам да си поверувам во очите, луди ли сме, ментални ли, има ли совест и кај луѓево и кај институцииве да следат протоколи и правила за работење“, напишал еден од граѓаните.
Друг пак, вели, „психопати, само во МК го има ова“. Или, пак, „е мое Скопје, до кога ваќа ќе те резилат. Има ли некој да стави крај на овие толку жални и немили настани“.
Се бара интервенција или од МВР или од други надлежни органи.