МВР го разгледува предлог-законот, никој незнае колку македонски државјанства ќе се поделат

Добивај вести на Viber

Никој засега не знае колку нови државјани ќе добие Македонија со предлог-измените на Законот за државјанства што го предложуваат албанските опозициски партии. Засега политичарите нафрлуваат само бројки, а денеска министерот за внатрешни работи Оливер Спасовски најави дека МВР допрва треба да се произнесе по ова прашање.

- Во МВР во моментов се разгледува законското решение, а очекувам до понеделник да го дадеме нашето мислење за истиот, рече Спасовски, кој додаде дека нема прецизна бројка колку граѓани би поднеле барање за стекнување со македонско државјанство.

Лидерот на „Левица“, Димитар Апасиев, вчера рече дека со законските измени „70.000 Косовари би можеле да се стекнат со македонско државјанство“ и дека со овој потег власта им се додворува на Алијанса за Албанците и Алтернатива за да обезбедува кворум во Собранието. Истата бројка ја спомена и Павле Трајанов, лидерот на Домократски сојуз и поранешен разузнавач.

Предлог законот предвидува познавање на еден од службените јазик кои се зборуваат во земјата, лицето да има документ за дозвола за престој 4 години и тројца сведоци кои гарантираат дека лицето кое бара државјанство живеело во тоа место најмалку 4 години.

„Сите овие граѓани Албанци на кои им е укинато тоа право, секако дека треба да им се даде правото. Секој политички субјект, политичар, ако имаат малку човечност, треба да мислат на тоа дека граѓанин без државјанство е граѓанин без здравствена заштита во време на пандемија и криза“, рече вчера Зијадин Села, претседателот на Алијанса за Албанците.