Нано Ружин: „Патоказот“ би бил само про-форма документ

Добивај вести на Viber

Универзитетскиот професор Нано Ружин смета дека таканаречениот „Патоказ“ за надминување на македонско-бугарскиот спор е документ кој ќе биде само про-форма и дека нема суштински да ги разниша нашите позиции во преговорите со Бугарија за отстранување на блокадата за започнување на преговори со ЕУ.

- Заев и по цена на својата политичка кариера е подготвен за компромис. Веќе е јасно дека преговорите не ги нарушуваат идентитетските и јазичните вредности на македонскиот народ. За реакцијата на Красимир Каракачанов пак би рекол „Си му дал на некоого кондури, сега тој прашува каде се врвките. Сметам дека до сега е направен голем исчекор во преговорите, рече поранешниот амбасадор во НАТО во вестите на Канал 5.

Ако констатираме дека Договорот не испорачува доверба, можеме да додадеме додатни механизми за следење на процесот, без да се прејудицира исходот на тие дебати и разговори, па и во форма на патоказ, најави вчера министерот за надворешни работи Бујар Османи.

Османи, говореше за споменувањето од Бугарија на варијанти за патоказ или “патна карта” за спроведување на Договорот за добрососедство.

- Договорот има предвидено механизми како да се контролира, но ако констатираме дека еве Договорот не испорачува доверба, можеме да додадеме додатни механизми за следење на процесот, без да се прејудицира исходот на тие дебати и разговори. Па, и во форма на патоказ, меѓутоа сметаме дека тоа не треба да биде дел од преговарачката рамка, затоа што ќе го помести процесот непотребно, вели Османи.

Тој додава дека патоказот, сепак, би бил дел од ЕУ-процесот, иако не би бил формално дел од Рамката, бидејќи со тоа не се согласуваат другите земји членки.

ВМРО-ДПМНЕ денеска објави дека нема да биде прифатен никаков „патоказ“ кој ќе значи „распарчување на Македонија“.