Не движете се во шума и не палете стрништа, глоби до 3000 евра
Објавено во: Мои пари 04 Август, 2017
Заради високите температури во овој период и зголемената опасност од појава на шумски пожари, Министерството за земјоделство,шумарство и водостопанство донесе мерки за претпазливост и забрана за движење во шуми.
Согласно член 57 (став 4) од законот за шумите, МЗШВ даде согласност за делумна забрана за движење во шумите со стопанска намена во период од 15 јули до 15 август 2017-та година.
За непочитување на одредбите од Законот за шумите, физичките лица кои ќе бидат затекнати да се движат во шума, без соодветна дозвола од Јавното претпријатие за стопанисување со државни шуми „Македонски шуми“ и субјектите кои управуваат со заштитените подрачја, ќе им се изрече глоба од 1500 до 2000 евра, согласно член 106 од Законот за шуми.
Оваа забрана не важи за вработените во јавното претпријатие и субјектите кои управуваат со заштитените подрачја. Исто така не важи и за организирани туристички групи придружувани од претставник на „Македонски шуми“ или претставник на субјектите кои управуваат со заштитените подрачја.
Забрането е палење на стрништа, плевел и друг земјоделски отпад, а непочитувањето носи изрекување глоба во висина од 1500 до 3000 евра.