„Недела неработен ден“ уште се преговара, работодавачите сепак ќе го имаат последниот збор
Објавено во: Економија 05 Декември, 2020
Веќе има некои заклучоци и сугестии, но конечната предлог верзија на законот со кој недела ќе стане неработен ден се уште не е готова. Министерката за труд и социјална политика Јагода Шахпаска рече денеска дека прашањето ќе биде отворено на економско социјалниот совет
Оваа дебата се уште тече. Вчера имавме онлајн состанок со сите чинители на социјалниот дијалог. Со претставници на синдикатите, претставници од Организација на работодавачи и комори. Дојдовме до некои заклучоци и сугестии на вчерашниот состанок и следниот чекор е истото прашање да се отвори на Економско-социјалниот совет, да разговараме и да биде дефинирана последната драфт верзија како законско решение, истакна Шахпаска.
Таа потенцира дека согласно задачата Министерството изработи драфт верзија на предлог законот и го испрати до колегите министри, но поради интересот и до сите чинители и партнери од социјалниот дијалог.
Потенцира дека тоа е предизборно ветување на СДСМ, но и заедно со владинот коалициски партнер е преточено како еден од законите што ќе биде донесен.
Инаку од Министерството за економија неделава потврдија дека нема да има промени во законите за трговија на мало, за угостителство и за туристичка дејност, односно овие дејности ќе продолжат да работат како и досега и во недела. Сепак, Законот за трговија ќе претрпи одредени измени, кој ќе се однесуваат на трговијата на големо, односно на големите магацини или маркети.
„За туристичките агенции и за угостителите најверојатно ќе остане постојното решение до средината на наредната година, а за Законот за трговија се прават неколку опции, посебно за трговијата на големо каде што ќе има одредени измени, но тие нема да се случат веднаш зашто треба да бидат информирани сите бизниси во земјава. Секако, треба првично да бидат информирани и во соработка со стопанските комори да се донесат такви решенија, изјави министерот за економија Крешник Бектеши.
Пред два дена од Сојузот на синдикати на Македонија соопштија дека законските измени кои ги разработува Министерството за труд и социјална политика нема да им овозможат на работниците строго да не работат во недела, затоа што работодавачите ќе имаат можност преку посебни закони и колективни договори да им го ограничат ова право.
„Иако Владата ја поздрави иницијативата и ја прифати истата за утврдување на недела за неработен ден за работниците, предложениот Предлог Закон за измени и дополнување на Законот за работните односи доставен од страна на Министерството за труд и социјална политика, не оди во правец на уредување на ова право недела да биде неработен ден за работниците во Државата.
Напротив со Предлог Законот за измени и дополнување на Законот за работните односи се уредени варијанти и можности со посебните Закони и Колективните договори дополнително да се ограничи ова право за работниците“, стои во реакцијата на ССМ откако го разгледале понуденото законско решение.