Никола Николовски: Вчера бев изложен на јавен линч, закани и ликувања за моја осуда

Добивај вести на Viber

Никола Николовски кој беше осомничен дека ги испратил мејловите до скопските училишта за закани за бомби, вели дека слободната мисла е повредна од секоја закана, притисок и уцена. 

Тој порача дека нема да го замолчат. Вчера тој беше уапсен, а потоа и ослободен. 

„Во текот на вчерашниот ден, среде бел ден и во време на вршење на моите работни обврски бев лишен од слобода, по што до доцните часови бев држен во полициска станица, без можност за контакт со моите пријатели, роднини и најтесното семејство. Јавен распит, претрес на мојот дом од страна на 10 полицајци, меѓу кои имаше и вооружени, мое спроведување од полициска станица до дома во придружба на вооружени службеници како најголем криминалец, товарење за дело кое не сум го направил и е АПСОЛУТНА НЕВИСТИНА! Вчера бев изложен на јавен линч, закани и ликувања за моја осуда. Ова е цената на јавното искажување став во Македонија. Ниту имам мотив, ниту потреба да вознемирувам цели фамилии со „дојавите за бомба во средните училишта“. Очигледно некому му пречи мојата работа со профилот „Боемот“, моите сфаќања, ставови, бескомпромисност во борбата за подобро утре, независноста од политиката и слободната мисла. Тоа што не те убива, те прави посилен“. Затоа продолжувам со засилено темпо јавно да го искажувам моето мислење, но овој пат наместо под псевдоним ќе го додадам и моето име: Никола Николовски“, стои во неговата изјава на социјалната мрежа Инстаграм.

Инаку, три дена по ред минатата недела  имаше дојави за бомби во средни училишта во Скопје. Истото се повтори и вчера. Министерот за внатрешни работи, Оливер Спасовски претходно изјави дека мејловите со закани се испратени од странство.