Нова демократија сака промени во Договорот од Преспа
Објавено во: Македонија, Балкан 03 Јули, 2019
Пратеникот од Нова демократија Никос Дендиас во интервјуто за грчката државна телевизија ЕРТ, објасни дека тие како партија она што би сакале да го направат е да постигнат промени на некои од одредбите на Договорот од Преспа, како што рече, „преговори со другата страна“.
„Постојат прашањата за јазикот и за националноста или државјанство, како сакате наречете го. Овие работи треба да се обидеме да ги подобриме. За ова, бидејќи како оружје ги имаме преговорите со Европската унија, ќе направиме обиди“, вели пратеникот од Нова демократија.
Тој објаснува дека тоа не значи дека 100% ќе успеат, туку дека ќе се обидат.
Додаде дека „договорот ги решава историските теми“ и тоа е нешто што тие може да го задржат онака како што е, а како позитивен го спомена членот 7.
Во дебатната информативна емисија на ЕРТ, Никос Дендиас истакна дека „не постои политичар од Нова демократија кој поддржува промена на границите на Балканот“, јави дописничката на МИА од Атина.