Објавен предлогот од Владата до Еко Герила да дозволи рестартирање на Југохром

Добивај вести на Viber

Алсат М објави документ на кој може да се види минатогодишното барање од страна на Владата на РМ до Еко Герила еколошката организација доброволно да се согласи комбинатот Југохром да се рестартира и без поставени филтри и да работи додека не започне новата сезона на загадување на воздухот.

Според предлогот, комбинатот од Јегуновце требало да работи со минимален капацитет, колку да ги врати работниците на работа, а за возврат Еко Герила да даде „благослов“, но тоа не било доволно, затоа што организацијата се сомневала дека сопствениците воопшто ќе постават филтри на краток рок.

Според документот  кој говори за средба од пред една година на претставниците на Еко Герила со премиерот Заев и вицепремиерот Анѓушев, се гледа дека тие побарале од Еко Герила да потпише договор со кој Југохром ќе биде реактивиран, а во меѓувреме ќе се работи на филтрите, но под услов паралелно да почне да работи со двете помали печки.

„Целта е работниците да се вратат на своите работни места, па со тоа да земаат и плати, истовремено, би дозволиле „Југохром“ да почне да работи со 30 отсто од своите капацитети, што значи, вклучување на двете помали печки со јачина од 22 мегавати за да работат до зимската сезона“. Во меѓувреме, сопственикот на „Југохром “, ќе треба да депонира банкарска гаранција со која ќе се обврзе во рок од осум месеци да ја заврши постапката за поставување филтри“., се вели во предлогот.

Како што дознава Алсат М, претставниците на Еко Герила не се согласиле на средбата. Од Еко Герила побараа меѓународна контрола и по поставување на филтрите.

Ова барање по се изгледа го загрижи директорот на Југохром, Васко Скендеровски, кој за медиумите, вчера изјави дека со ова Еко Герила се става над институциите и законите на земјата.