Обвинителството побара притвор за инспекторот на УЈП осомничен за поткуп
Објавено во: Македонија 05 Февруари, 2020
Основното јавно обвинителство Гостивар поведе постапка против едно лице за кое постои основано сомнение дека сторило кривични дела – Злоупотреба на службена положба и овластување од член 353 и Примање поткуп од член 357 од Кривичниот законик.
„Осомничениот инспектор во Управата за јавни приходи – Тетово побарал поткуп од 300 евра од сопственик на правен субјект во кој извршил контрола и констатирал неправилности. Имено, иако оштетениот платил глоба за констатираните неправилности, осомничениот продолжил да му се јавува и да му праќа пораки во кои барал поткуп затоа што не извршил пломбирање на деловниот простор.
Оштетениот го пријавил настанот во полиција и на 4 февруари се согласил да се сретне со осомничениот во угостителски објект во Гостивар. Притоа, му предал 150 евра во претходно обележани банкноти.
Бидејќи постојат околности кои што укажуваат на опасност од бегство, надлежниот јавен обвинител до судијата на претходна постапка при Основниот суд во Гостивар достави Предлог за определување мерка притвор за осомниченото лице“, соопшти Обвинителството.
Инаку, приведениот инспектор од Управата за јавни приходи, кој барал поткуп од 300 евра, е всушност поранешен управник на Регионалната дирекција на УЈП Тетово.
Ова денеска го потврди директорката на Управата за јавни приходи Сања Лукаревска, која му се заблагодари на бизнисменот што го пријавил случајот.
„Очигледно дека станува збор за изолиран случај кој не е честа појава во општеството. Во УЈП максимално сме посветени на чесно, транспарентно и законито работење на сите инспектори и даночни контролори. Сепак, секој инспектор си одговара за самиот себе колку ги почитува законите и колку не ја злоупотребува службената должност. Му благодарам на обврзникот што се охрабрил да го пријави ова дејство. Понатаму ќе видиме како ќе се одвива целиот процес за инспекторот кој е и поранешен управник на Регионалната дирекција Тетово“, рече Лукаревска.