Оставка на премиерот и владата на Словачка по убиството на новинарот и неговата вереница
Објавено во: Балкан 15 Март, 2018
Оставка на словачкиот премиер Роберт Фицо и неговата влада поради политичката криза до која дојде по убиството на истражувачкиот новинар и неговата вереница. Претседателот на Словачка Андреј Киска ја прифати оставката на Фицо и побара од Петер Пелегрини, досегашниот заменик премиер да формира нова влада.
Со ваквата одлука ќе се задржи сегашната владина коалиција во која има три партии и ќе се избегнат можни предвремени избори.Според Фицо тие не би донеле никаква стабилност. Следните редовни парламентарни избори би требало да се одржат во 2020 година. Пелегрини, кој исто така е од социјал демократската партија на Фицо, би ја формирал истата коалиција, со партијата на етничките Унгарци и ултра националистичката Словачка национална партија.
Минатата недела Словачка се крена на нозе. Илјадници луѓе протестираа во земјата и бараа оставка од владата и длабинска истрага за убиството на 27-годишниот новинар Јан Куцијак и неговата девојка Мартина Куснирова кои беа пронајдени застрелани во нивната куќа во источниот дел на Братислава .