Пациентите и вработените во јавниот сектор под притисок да ја инсталираат „Стоп корона!“

Добивај вести на Viber

Владата на синоќешната седница донесе заклучок според кој во наредниот период  ќе им препорача на сите вработени лица во јавниот сектор, како и на тие во приватниот,  да ја инсталираат мобилната апликација „Стоп корона!“.

- Органите на државната управа, јавните претпријатија основани од државата, акционерските друштва во државна сопственост, агенции, фондови, бироа, заводи, управи и сите останати државни институции, како и се укажува на единиците на локалната самоуправа, јавните претпријатија и другите правни лица основани од единиците на локалната самоуправа, како и на вработените лица од приватниот сектор да ја преземат мобилната апликација „Стоп корона!, се вели во заклучокот на Владата.

Укажано му е и на Фондот за здравствено осигурување да ги задолжи сите матични лекари на територијата на Република Северна Македонија на своите пациенти да им препорачаат инсталирање на оваа апликација. Службата за односи со јавност на Владата ќе направи интензивен план за медиумско информирање на оваа мобилна апликација, додека Министерството за информатичко општество и администрација ќе предложи дополнителни стимулативни мерки за лицата кои ќе ја преземат.

На наредната седница ќе се разгледа уредба со законска сила во која правно ќе се нормира обврска на сите телевизии и радија да обезбедат емитување на информативни пораки подготвени од Министерството за здравство и Владата на Република Северна Македонија во врска со КОВИД-19 во времетраење од 2-3 минути на секој час.