Пред Уставен суд се оспорени три одлуки на општина Маврово и Ростуше
Објавено во: Македонија 21 Февруари, 2022
Во Уставниот суд на 16 февруари пристигна иницијатива од адвокатот Драган Пешевски од Скопје, која се однесува на оценување на уставност и законитост на три одлуки на општина Маврово и Ростуше. Оспорени се:
Одлука за усвојување на урбанистички план за село Маврово со детална разработка на дел од Урбан блок 5 и дел од урбан блок 7 објавен во службен гласник за општина Маврово и Ростуше донесена на ден 26.02.2015 година.
Одлука за усвојување на урбанистички план за село Леуново, Никофорово и Анови објавена во службен гласник за општина Маврово и Ростуше на ден 19.07.2001 година
Одлука за отстапување со стопанистување на водоводот од кој се снабдува хотел Радика во леуново донесена на 32 седница одржана на ден 25.10.2019
Уставниот суд испрати укажување до адвокатот Драган Пешевски со кое се бара дополнување и прецизирање на иницијативата, односно да се прецизира дали се оспорува само законитоста или и уставноста и законитоста на овие одлуки.
„Доколку се оспорува и уставноста заедно со законитоста, потребно е за секоја оспорена одлука да се наведе која уставна одредба е повредена и да се наведат причините за оспорување на уставноста. Имено, поднесокот е насловен како „Иницијатива за оценка на уставност и законитост” и е поставено барање за поништување на оспорените акти затоа што биле „спротивни на Устав и закон”, но во истиот никаде нема наведено кои уставни одредби се повредени, ниту пак се дадени причини за такво оспорување“, соопштија од судот.
Доколку иницијативата не биде дополнета во рок од 10 дена од приемот на укажувањето, согласно член 16 став 2 од Деловникот на Уставниот суд на Република Северна Македонија, ќе се смета дека поднесокот не бил поднесен.